Sunday October 2, 2016
News Feeds:
2016.07.23 වන දින මහනුවර සහ මාතලේ යන ප්‍රදේශවල පැවැති එක්සත් ජාතික පක්‍ෂ සාමාජික ප්‍රවර්ධන වැඩසටහන්වලදී අදහස් දැක්වූ එක්සත් ජාතික පක්‍ෂ නායක හා අග්‍රාමාත්‍ය රනිල් වික්‍රමසිංහ මහතා. PDF Print E-mail

අපි ඉදිරියට යන්න හිතන අයගේ පක්‍ෂය. අපි ජනතාවගේ පක්‍ෂය. අපි තවම පළාත් සභාවලත් ප්‍රාදේශීය සභාවලත් විපක්‍ෂයේ ඉන්න පක්‍ෂය. අපි විප්ලවයක් කරල ජාතික ආණ්ඩුවක් ඇති කළ පක්‍ෂය. එක්සත් ජාතික පක්‍ෂය ඉදිරියට යන පක්‍ෂයයි.

ඩී.එස්. සේනානායක මැතිතුමා දුරදිග බලලා 1946 සැප්තැම්බර් 06 වැනිදා පක්‍ෂයක් හදන්න ඉදිරියට යන ජනතාව ඒකරාශී කරගත්තා. මේ රටේ දියුණුව, ප්‍රගතිය බොහෝදුරට ඇති වුණේ එක්සත් ජාතික පක්‍ෂය නිසයි. ලංකාවට අද නිදහස ලබාදුන්නා. ප්‍රජාතන්ත්‍රවාදී පාලන ක්‍රමයක් ඇති කළා. මේ ප්‍රදේශයත් දියුණු කළා. ඒ වගේම විශාල දියුණුවක් ජේ.ආර් ජයවර්ධන ජනාධිපතිතුමා යටතේ මේ රටේ ඇති වුණා. රටේ ආර්ථිකය විවෘත කළා. මහවැලිය වැනි දැවැන්ත ව්‍යාපෘති ආරම්භ කළා. නවීකරණයක් සිදු කළා. ප්‍රේමදාස ජනාධිපතිතුමා ඒ ක්‍රියාදාමය තවත් ඉදිරියට ගෙන ගියා. නිවාස හදා දුන්නා. වෙළඳ කළාප, කර්මාන්තශාලා ආරම්භ කළා. අඩු තරමින් ගමේ තරුණයින්ට ක්‍රිකට් ක්‍රීඩා කිරීමේ අවස්ථාව ලබාදුන්නේ කවුද? මේ හැම දෙයක්ම කළේ කවදත් ඉදිරියට යන එක්සත් ජාතික පක්‍ෂයයි.

අපි පස්සට යන්නේ නැහැ. අපි රට ගැන හිතනවා. ඉතා අමාරු කාලෙක, මේ රටේ පවුල් ඒකාධිපතිවාදයක් තිබුණ කාලෙක, මාධ්‍ය මර්ධනයක් තිබුණ කාලෙක, සෞඛ්‍ය නිදහස් අධ්‍යාපනය කප්පාදු කළ කාලෙක. අපේ රට ලෝකෙන් කොන් වුණු කාලෙක මර්දනය තිබුණු කාලෙක රට බේරාගැනීමේ අදහසින් ශ්‍රී ලංකා නිදහස් පක්‍ෂය සමග එකතුවෙලා මෛත්‍රීපාල සිරිසේන මහතා ජනාධිපතිවරයා වශයෙන් පත් කරලා රට ඉදිරියට ගෙනයාමට කටයුතු කළා.

එදා බොහෝදෙනා කිව්වා රනිල් වික්‍රමසිංහට අනාගතයක් නැහැ කියලා. නමුත් අපි ඒ අභියෝගය ජයගත්තා.

මේ රටේ ජාතික ධනය සොරකම් කිරීම නවත්වන්න. මේ රටේ නිදහස් අධ්‍යාපනය කප්පාදු කිරීම, නිදහස් සෞඛ්‍ය සේවය කප්පාදු කිරීම නවත්වන්න. මේ රටේ තරුණ තරුණියන්ට රැකියා ලබා දෙන්න. ශක්තිමත් මධ්‍යම පන්තියක් ඇති කරන්න. ග්‍රාමීය ආර්ථිකය කඩාවැටීම නවත්වන්න. යහපාලනයක් ඇති කරන්න. ඒ වගේම අලුත් ආණ්ඩු ක්‍රමයක් ඇති කරන්න. රටේ සිටින සියලු ජනතාවටම හොඳ අනාගතයක් බිහි කරන්න. අපි පොදු අපේක්‍ෂකයෙක් පත් කර ගත්තේ ඒ නිසයි. ශ්‍රී ලංකා නිදහස් පක්‍ෂයේ මහලේකම් මෛත්‍රීපාල සිරිසේන මැතිතුමා මේ රටේ ජනතාව ජනාධිපති කළා.

අපි විතරක් නොවෙයි. චන්ඬිකා කුමාරතුංග මැතිණිය, දුමින්ද දිසානායක මැතිතුමා ශ්‍රී ලංකා නිදහස් පක්‍ෂයේ කොටසක්. ද්‍රවිඩ සන්ධානය, ජනතා විමුක්ති පෙරමුණ, මහා සංඝරත්නය, කතෝලික, ඉස්ලාම්, හින්දු පූජක පක්‍ෂය, මේ සියලූ දෙනාම එතුමා ජනාධිපති බවට පත් කරන්න කටයුතු කළා. අපි මහ මැතිවරණයක් පවත්වා රජයක් බිහි කළා. දැන් රජය වැඩ පටන් අරන් තිබෙනවා. රටේ ජාතිවාදය තුරන් කර සංහිදියාව ඇති කරන්න කටයුතු කොට තිබෙනවා. අපට විරුද්ධව ජාත්‍යන්තරය තුළ තිබූ මතය මංගල සමරවීර ඇමැතිතුමා නැති කළා. දැන් අපට සංවර්ධන ව්‍යාපාර පටන් ගැනීමේ අවස්ථාව එළඹි තිබෙනවා. අපි දැන් ජනතාවට දුන් පොරොන්දු ඉටු කළ යුතුයි. සමහරු මේ වැඩ කටයුතුවලට විරුද්ධ වේවි. ප්‍රජාතන්ත්‍රවාදී සමාජයක් තුළ එසේ විරුද්ධවීමට අවකාශ තිබෙනවා. අපට දොස් කියන්න පුළුවන්, විකල්ප යෝජනා ඉදිරිපත් කරන්නට පුළුවන්. මේවා ප්‍රශ්න නොවෙයි ප්‍රජාතන්ත්‍රවාදයේ කොටසක් පමණයි.

අපිත් අපේ වැඩ සටහන ඉෂ්ඨ කරගෙන යනවා. දූෂණවල යෙදුණ අය අල්ලනවා. සමහරු ඩීල් දානවා කියල මට බැන්නා. අපි වැඩකරන්නේ නීතියට අනුවයි. වැරැද්ද නිවැරැද්ද උසාවිය තීන්දු කරාවි. මම කියා තිබෙන්නේ සියයට දෙසීයක් විශ්වාස නැත්නම් නඩු පවරන්න එපා කියලයි. එහෙම නැත්නම් යමක් හෝ සිදු වුණොත් අපට දොස් පවරාවි. මේ කරුණේ දී මෙයට වඩා වැඩි යමකට මම අතගහලා නැහැ. අතගහන්නෙත් නැහැ.

දැන් අලූත් ව්‍යාපාරයක් තිබෙනවා. මේ රට බේරගන්න, දූෂණයට විරුද්ධ නඩු පවරපු අය නිදහස් කරන්න කියලා ඉල්ලනවා. ආණ්ඩුව පෙරලන්න හැම තැනම විරෝධතා කරනවා. ඉල්ලීම් රාශියක් තිබෙනවා. මේ ඉල්ලීම් සියල්ලම ප්‍රජාතන්ත්‍රවාදය ආරක්‍ෂා කරන්නටද? නිදහස් අධ්‍යාපනය ආරක්‍ෂා කරන්නටද? රැකියා ලබා දෙන්නටද? නෑ. එකම පොදු ඉල්ලීම දූෂණ කටයුතුවල හිරවෙලා, අහුවෙලා නඩු පවරපු අයගෙන් පළිගන්න එපා මේ ආණ්ඩුව පන්නා දමන්න කියලයි ඔවුන් ඉල්ලා සිටින්නේ.

මේ ආණ්ඩුව පන්නලා දමලා අපට හොරකම් කරන්න ඉඩ දෙන්න කියලයි ඔවුන් ඉල්ලා සිටින්නේ. එයාබස්වලින් හොරකම් කරන්න, ශ්‍රී ලංකා ගුවන් සේවයෙන් හොරකම් කරන්න ඉඩදෙන්න කියා ඔවුන් ඉල්ලනවා. මේ ආණ්ඩුව අලූත් නීති ගෙනාවායින් පසුව රුපියල් බිලියන 1300 ක් ආණ්ඩුවේ අනුමැතිය නැතිව හොරකම් කරන්න බැහැ. ඒ නිසා හොරකම් කරන්න ඉඩ ඉල්ලන එක හොරුන්ගේ පැත්තෙන් සාධාරණයි. අපේ පැත්තෙන් ඒක අසාධාරණයි. මට කියන්න පසුගිය ආණ්ඩුවෙන් හොරකම් නොකරපු රජයේ ආයතනයක් තියෙනවද කියල. යුද හමුදාවෙන්, ගුවන් හමුදාවෙන්, ලංගමයෙන්, වරායෙන් හොරකම් කළා. ඒවායින් නැවත හොරකම් කරන්න නේද ඒ අයව පත් කරන්න කියන්නෙ.

දැන් අපි බලයට ඇවිත් සිටිනවා. අවුරුදු පහකට පස්සේ, ජනතාව අපට යන්න කිව්වොත් අපි යනවා. ඒත් හොරු යන්න කියල කිව්වට අපි යන්නේ නෑ. හොරු ආරක්‍ෂා කරන්න අපට බැහැ. එහෙම නම් පාරට බැහැල හොරු එලවන්න කියල කටයුතු කරන්න අපි ලෑස්තියි කියල කියන්න කැමැතියි.

මට පෙරේදා සන්ධානයේ කෙනෙක් කිව්වා, ඒ ගොල්ල යන කොට ඒ පැත්තේ ව්‍යාපාරිකයෝ ඔවුන් පිලිඅරගෙන හොඳට සංග්‍රහ කරනවා කියල. සමහර ව්‍යාපාරිකයන්ට වැට් ගැන ප්‍රශ්න තිබෙනවා. ඔවුන් ජනාධිපතිතුමා මුණගැහුණා. අපි උසාවියේ නඩුව අවසන් වුණායින් පසුව අපට දෙන්න පුළුවන් සහන ගැන පාර්ලිමේන්තුවේදී ප්‍රකාශ කරනවා කියලා මම කිව්වා. ඒ තීරණයෙන් බොහෝ අය සෑහීමකට පත්වී ඇති බවත් මම ඔහුට ප්‍රකාශ කළා. නෑ නෑ තවත් අය විරුද්ධව ඉන්නවා කියා ඔහු මාහට කියා සිටියා. කළු කඩකාරයෝ ඔබලා පිළිගත්තට මට කමක් නෑ. – කළු කඩකාරයෝ ඔබලා සමග නැවත එකතු වී පාරිභෝගිකයන් ගසා කන්න සූදානම් වන බව මම කියා සිටියා. ඒ වගේම තමයි සමහර මාධ්‍ය, විශේෂයෙන් මුද්‍රිත මාධ්‍ය, මේ ගොල්ල එක්ක එකට කාපු බීපු උදවිය. එකට සල්ලි ගත්ත අය. හම්බ කරපු අය. මම ඊළඟ දවස් කීපය තුළ එක් එක් කෙනා නම් කරන්න බලාපොරොත්තු වෙනවා.

ජාත්‍යන්තරය අපව පිළිකුල් කරලා තිබුණෙ. මංගල සමරවීර ඇමැතිතුමා ගත්ත පියවර නිසා අද තත්ත්වය සම්පූර්ණයෙන් වෙනස් වෙලා තිබෙනවා. අද ලෝක නායකයෝ මේ රටට එනවා. අපට ඒ රටවලට ආරාධනා කරනවා. ජනාධිපතිතුමා හැම රටකටම යනවා. අද අපට එක්සත් ජාතීන්ගේ සංවිධානයෙන්, මානව හිමිකම් අංශවලින් කිසිම ප්‍රශ්නයක් නෑ. ජී7, ජී9 ලෝක නායකයන්ගේ රැස්වීම්වලට ජනාධිපතිතුමාට ආරාධනා කළා. එතුමා ඒ රැස්වීම්වලට සහභාගී වුණා. කවුද ඒක කළේ. අපේ ප්‍රතිපත්තිවලට අනුකූලව මංගල සමරවීර ඇමැතිතුමා ඒක කළා.

මංගල සමරවීර ඇමැතිතුමා අයින් කරන්න කියලා සඳුදා ඩේලිමිරර් පුවත්පතේ පළ කොට තිබුණා. ඔය ඩේලිමිරර් කර්තෘ මටත් අයින් වෙන්න කියලා කියාවි. දැන් එයා අයින්වෙන්නෙ නැත්නම් අපිටත් බලන්න වේවි මොකක් ද කරන්නෙ කියල. එයා හැමදාම මහින්ද රාජපක්‍ෂගේ මේසේ හිටියේ. හැමදාම ඔහුට කඩේ ගියා. ඔය පත්තරේ මුස්ලිම් මිනිස්සුන්ට විරුද්ධව ලිව්වා. දෙමළ මිනිස්සුන්ට විරුද්ධව ලිව්වා. අපේ මිනිස්සුන්ට යන්න කියනවා නම් ඊට පෙර මේ අයට හොඳ පාඩමක් උගන්වමු කියලා මම කියන්න කැමැතියි. අපි අපේ අවුරුදු පහ ගෙනියනවා. ජනතාව අනුමැතිය දුන්නොත් තවත් ඉදිරියට යන්න පුළුවන්. ඒ අයට ඔය සෙල්ලම් කරන්න ඉඩදෙන්න බැහැ.

මේ ආර්ථිකය කඩා කප්පල් කරන්න ෆයිනෑන්ෂල් ටයිම්ස් පත්තරෙත් බැලුවා. මාසයක් එක එක කතා දැම්මා. අන්තිමට සිදුවුණේ කුමක්ද? අපි බැඳුම්කරේ ගන්න ගියාම, අපි බිලියන 1.5 ක් ඉල්ලූවාම අපිට 6.7 ක් ලැබුණා. ගත්තේ බිලියන 1.5 යි. අපිට ඊට වඩා අවශ්‍ය වුණේ නැහැ. මෙහෙම පත්තරවලට අපට පාඩම් උගන්වන්න සිදුවෙනවා. පුවත්පත්වලට විවේචනය කරන්න පුළුවන්. ඒත් ජනතාව පත් කළ ආණ්ඩුව පරාජය කරල හොරුන් බලයට ගේන්න ඒ අය බලනව නම් ඒ අයට දඬුවම් කරන්න ඕන. දැන් මට දොස් කියාවි පාඩම් උගන්වනවා කිව්ව කියලා.

මම ආපහු ඊළග අයගෙ නම් ටිකත් කියනවා. ඒ ආයතනවල අය ඇවිත් මට කියල තියෙනවා සිදුවෙන්නේ මොනවද කියල. මමත් හැමදාම මාධ්‍ය නිදහස වෙනුවෙන් සටන් කළ කෙනෙක්. නමුත් ඒ අය මහින්ද රාජපක්‍ෂ මහත්තයට කඩේ ගිය අයයි. තව තවත් කෑ නොගහා ඉන්න කියලා මම ඒ අයට කියන්න කැමැතියි. හෙට අනිද්ද කැදවන අයගෙ නම් ටික මම ප්‍රසිද්ධියේ වුණත් කියන්නම්. ආණ්ඩුව විවේචනය කළාට මට කමක් නෑ. ඒත් මෛත්‍රීපාල සිරිසේන මැතිතුමාගේ ප්‍රධානත්වයෙන් ඇති කළ රජය පෙරලා දමන්න දෙන්න බැහැ. දැන් හරි අමාරුවක් හැදිලා තියෙනවා. එදා ගිහින් පිනට කෑව බීව මන්දිරයේ දැන් ඉන්නේ මමයි. මම පිනට කෑම දෙන්නෙ නෑ. ඒ නිසා මම ආරාධනා කරන්නෙත් නැහැ.

ඕන තරම් අපිට විරුද්ධ වෙන්න. ඕන තරම් පෙළ පාලි යන්න. ඕන තරම් රැස්වීම් පවත්වන්න. කිසිම ප්‍රශ්නයක් නැහැ. ඒත් මම එකක් කියන්න කැමතියි. හොරුන් දමන්නට ආණ්ඩුව පෙරලන්න හදනව නම්, ඒකට නිසි පිළිතුරු දෙන්න අපිත් පාරට බහින්න සූදානම් කියල මම කියන්න කැමැතියි.

අපි දැන් සංවර්ධනය ආරම්භ කරල තියෙන්නෙ. එදා ලෝකයේ තිබුණු ලොකුම පිහිනුම් තටාකය අද චීනය සමග එකතුවෙලා නැව් පිරෙන වරායක් බවට පත් කරන්න කටයුතු කරලා තියෙනවා. එදා දවසකට මගීන් දෙදෙනෙක් පමණක් ආව මත්තල ගුවන් තොටුපොළ අද මගීන්ගෙන් පිරවීමේ වැඩ කටයුතු ආරම්භ කර තිබෙනවා. දවසක් මත්තල හිටියෙ එක මගියයි. ඒ මමයි. මම හෙලිකොප්ටරෙන් බැහැලයි ආවේ.

හම්බන්තොට ප්‍රදේශයේ අක්කර 05ක කර්මාන්ත ශාලා ඇති කිරීමේ ව්‍යාපෘති ආරම්භ කර තිබෙනවා. මේ මහනුවර නගරයට එජාපය ණය ගැතියි. පේරාදෙණියේ සිට කුණ්ඩසාලේ දක්වා මහනුවරක් කරනවා. මහනුවර මැද මහනුවරක් කරනවා. ඕනෑ නම් උඩුනුවරක් නැත්නම් යටිනුවරක් දක්වා ගෙන යනවා. ඒ අලූත් නුවර මැදින් මධ්‍යම අධිවේගී මාර්ගය ගමන් කරනවා. අපි ඒ මධ්‍යම අධිවේගී මාර්ගයේ කටයුතු ජපානයට භාරදුන්නා.

බෝගම්බර හිරගෙදර විශාල සංස්කෘතික මධ්‍යස්ථානයක් බවට පත් කරනවා. තව වැඩ කටයුතු ගණනාවක් තිබෙනවා. රැකියා ලබාදීමේ වැඩ කටයුතු තිබෙනවා. මධ්‍යම අධිවේගී මාර්ගය විවෘත වුණාම ඒ අවට පමණක් නොව කුරුණෑගල හා රඹුක්කන වැනි පළාත්වලත් කර්මාන්ත ආරම්භ වෙනවා. සංචාරක ව්‍යාපාරය වගේම මට වඩාත් අවශ්‍ය කෘෂිකර්ම අංශය දියුණු කරන්නයි. රජයේ ජනතා වතු සංවර්ධන මණ්ඩලයේ, වැවිලි සංස්ථාවේ ඉඩම් ලබාගෙන කෘෂි කර්මාන්තයේ අභිවෘද්ධිය උදෙසා යොදවනවා. සමහර කෘෂිකර්ම වැඩ සටහන් සඳහා දැනට හොඳ ඉල්ලුම් තිබෙනවා. බහුතර ඉඩම් මේ ප්‍රදේශවල ජනතාවට බෙදා දෙනවා.

රාජපක්‍ෂලා මෙය බදාගෙන හිටියා අවුරුදු ගණනාවක්. අලුත් නීතිය ක්‍රියාත්මක කළායින් පසුව  ජනතාවට ඔවුන් පදිංචිව සිටින ඉඩම්වල සින්නක්කර අයිතිය ලබාදෙනවා. ඒවගේම රජයේ තට්ටු නිවාසවල අයිතියත් ලබාදෙනවා. වෙස්සන්තර රජතුමා වගේ දෙන්න තියෙන සියල්ලම දෙනවා. ඒ ගොල්ල ගත්ත දේවල් අපි නැවත ලබාදෙනවා. කොළඹ ආරම්භ කරන බස්නාහිර මහා නගරේ කර්මාන්ත ඇරඹෙනවා. අලුත් නගර, වයඹ සංවර්ධනය, මහනුවර සංවර්ධනය මේ ව්‍යාපෘතිවලට අයත් බව කියන්න කැමැතියි.

ඉන්දියාව, මුම්බායි - දිල්ලි කොරිඩෝර් ආරම්භ කළා වගේම ලංකාවෙත් එවැනි වැඩසටහන් ආරම්භ කරනවා. එක පැත්තකින් ත්‍රීකුණාමලය දියුණු කරනවා. ජනාධිපතිතුමා පොළොන්නරුව දියුණු කරනවා. විපක්‍ෂය පාරට බහින්නෙ මේ සංවර්ධන වැඩසටහන් නතර කරන්නට ද? ඔවුන් ඉල්ලා සිටින්නේ මොනවගේ දේවල් ඇති කරන්න කියලා ද? අවුරුදු 70 ක් පැරණි අපේ පක්‍ෂය දාල යන්න දෙන්න බැහැ. ඒක හදල දීල යනවා. ඒකයි අපි ෙඉදිරියට යන්න හිතන අයට මෙතනට එන්නෙ කියල කියන්නෙ.

මේ සතියේ ඉදන් අපේ සාමාජිකයෝ බදවා ගැනීමේ ව්‍යාපාරය අපි ඉදිරියට ගෙනියනවා. හැමදාම ගිහින් මේ වැඩ කටයුත්ත කරන්න. සතියෙ දවස්වල, සති අන්ත දවස්වල ගෙයින් ගෙට යන්න. පාරෙන් පාරට යන්න. ජනතාවගේ අයිතිවාසිකම් ආරක්‍ෂා කරනවා කියන පණිවුඩය ඔවුන්ට දෙන්න. එසේ කටයුතු කරල අපි අපේ 70 වෙනි සංවත්සරය හොදින් සිදු කරල අලූත් විදියකට පක්‍ෂය සංවිධානය කළ යුතුයි. අපි අලූත් විදියට හිතන්නට ඕන. අපි එතැනට යමු.

මේ කටයුතු සංවිධානය කළ අපේ සභානායක ලක්‍ෂ්මන් කිරිඇල්ල ඇමැතිතුමාට මම විශේෂයෙන් ස්තුතිවන්ත වනවා. එතුමා පාර්ලිමේන්තුවේ සිට සටන මෙහෙයවනවා. හැමදාම ප්‍රශ්නවලට පිළිතුරු දෙනවා. පිළිතුරු ආපහු හරවනවා. මේ වැඩ සටහන සාර්ථකව ඉදිරියට ගෙන යෑමට ඔබ සියලූ දෙනාගේම සහාය ලබාදෙන ලෙස ඉල්ලමින් මම මගේ කතාව අවසන් කරනවා.


Last Updated on Monday, 25 July 2016 19:39
 
දකුණු පළාතේ ආර්ථිකය නගාසිටුවීම පිළිබද විශේෂ සාකච්ජාවක් අග්‍රාමාත්‍ය රනිල් වික්‍රමසිංහ මැතිතුමන්ගේ ප්‍රධානත්වයෙන් PDF Print E-mail
දකුණු පළාතේ ආර්ථිකය නගාසිටුවීම පිළිබද විශේෂ සාකච්ජාවක් අග්‍රාමාත්‍ය රනිල් වික්‍රමසිංහ මැතිතුමන්ගේ ප්‍රධානත්වයෙන් අද (15) දින හම්බන්තොට වරාය ශ්‍රවනාගාරයේදී පැවැත්විණි. එම අවස්ථාවට අග්‍රාමාත්‍ය කාර්යමණ්ඩල ප්‍රධානී සහ නීතිය හා සාමය සහ දක්ෂිණ සංවර්ධන අමාත්‍ය ගරු සාගල රත්නායක මහතා සහ නිවාස හා ඉදිකිරීම් අමාත්‍ය ගරු සජිත් ප්‍රේමදාස මහතාද සහභාගී විය. ඊට අමතරව නීතිය හා සාමය සහ දක්ෂිණ සංවර්ධන අමාත්‍යංශයේ ලේකම් ජගත් පී. විජේවීර මහතා ඇතුලු දිසාපතිවරුන් සහ රාජ්‍ය ආයතන ප්‍රධානීන්ද මෙම අවස්ථාවට සහභාගීවී සිටියේය."
 
සාමාජික ප්රයවර්ධන වැඩසටහන අග්රාරමාත්යව රනිල් වික්ර්මසිංහ මහතාගේ ප්රාධානත්වයෙන් තොටලග PDF Print E-mail


එක්සත් ජාතික පක්‍ෂය යනු ඉදිරියට යන්න හිතන අයගේ පක්‍ෂයයි. අප සියලූ දෙනාම ඉදිරියට යාම පිළිබඳව කල්පනා කරනවා. අප ජීවිතයේ ඉදිරියට යන්නේ කෙසේද? හොඳ ආදායමක් ලබාගන්නේ කෙසේද? අපේ ව්‍යාපාරය දියුණු කර ගන්නේ කෙසේද? අප රැකියාව කරන ස්ථානයේ තත්ත්වය තවත් දියුණු කර ගන්නේ කෙසේද? උසස් වීමක් ලබා ගන්නේ කෙසේද? නිවසක් හදා ගන්නේ කෙසේද? තව දුරටත් අධ්‍යාපන සුදුසුකම් ලබාගන්නේ කුමන ආකාරයෙන්ද? මේ ආකාරයට අප සියලූ දෙනාම තනි තනිව ඉදිරියට යාමට බලාපොරොත්තුවෙන් සිටිනවා.

එක්සත් ජාතික පක්‍ෂය යනු එලෙස ඉදිරියට යාමට කල්පනා කරන අයගේ සංවිධානයයි. වසර 70 කට පෙර මහාමාන්‍ය ඩී.එස්. සේනානායක මහතා එස්සත් ජාතික පක්‍ෂය ඇරැඹූයේ ඉදිරියට යාමට සිතන ජනතාව එකතු කර ගෙනයි. අප රට ඉදිරියට ගෙන යා යුත්තේ ඉදිරියට යාමට සිතන ජනතාවගේ වේගය සහ ජවයේ ශක්තිය ලබා ගෙනයි. ඒ සඳහා අප සියලූ දෙනාම එකතු විය යුතුයි. මෙහි සිටින බොහෝ අය එක්සත් ජාතික පක්‍ෂයට ඡන්දය ලබා දුන් අයයි. ඉදිරියේ දී ඡන්දය ලබාදීමට බලාපොරොත්තු වන අයත් මෙහි සිටිනවා. රට ඉදිරියට ගෙන යාම සඳහා අපගේ සාමාජික කාඩ් පත් ලබා ගෙන අප සමග එකතු වන්නැයි සියලූ දෙනාගෙන්ම ඉල්ලා සිටිනවා.

කඩ සාප්පුවල වෙළෙදාම් කරන ජනතාව, පදික වේදිකාවේ වෙළෙදාම් කරන ජනතාව ඇතුලූ සියලූම පිරිස් එක්රොක් වී අපි ජන බලවේගය නිර්මාණය කළ යුතුයි. අප සියලූ දෙනාම ජනතාව අතරට ගොස් ජනතා බලවේගය ශක්තිමත් කිරීම සඳහා සාමාජිකයන් බඳවා ගත යුතුයි. එක්සත් ජාතික පක්‍ෂයේ 70 වන සංවත්සරය වෙනුවෙන් මාස දෙක තුනක් තිස්සේ අප සාමාජික ප්‍රවර්ධන වැඩසටහන ක්‍රියාත්මක කරනවා.

වසර 70 ක් තිස්සේ අප රට ආරක්‍ෂා කොට තිබෙනවා. අනාගතයේදීත් රට ආරක්‍ෂා කිරීම අපේ වගකීමයි. ඉදිරියට යන පිරිස සිටින පක්‍ෂයක් ලෙස, ආණ්ඩුවක් ලෙස පළමුවෙන්ම කළ යුත්තේ ඉදිරියට යාමට සූදානම් ජනතාව ජීවත් කරවීමයි. අප එම තීන්දුව ගෙන තිබෙනවා. 2015 දී දින 100 ආණ්ඩුව යටතේ ඔබගේ සංවිධායක රවී කරුණානායක ඇමැතිතුමාගේත් මූලිකත්වයෙන් ජනතා සහන ගණනාවක් ලබා දුන්නා. රජයේ සේවකයන්ගේ මාසික වේතනය වැඩි කළා. බඩු මිල අඩු කළා. ඉන්ධන මිල අඩු කළා. ජීවත් වීමට සුදුසු වටපිටාවක් නිර්මාණය කළා. එවැනි පියවරවලින් පමණක් ප්‍රශ්න විසදෙන්නේ නැහැ. හදිසියේ භාණ්ඩ මිල වැඩි වුණා. එම නිසා අත්‍යවශ්‍ය භාණ්ඩ සහන මිලට ජනතාවට ලබාදීමට රජයට යුතුකමක් ඇති බව අප කල්පනා කළා. ඒ නිසා පසුගිය සතියේ දී අත්‍යවශ්‍ය භාණ්ඩ 15 ක් සාධාරණ මිලකට ලබාදීමට අප රජය තීන්දු කළා. එම භාණ්ඩවල මිල හදිසියේ වැඩි වුවහොත් ඒ සඳහා රජය මැදිහත් වී සහනාධාරයක් ලබාදීමට ද රජය තීන්දු කර තිබෙනවා. ජනතා සුභ සාධනය වෙනුවෙන් මිල පාලනය කිරීම සඳහා අවශ්‍ය වන මුදල් අප ලබාදෙනවා.

මේ වසරේ මෙන්ම ලබන වසරේදීත් අත්‍යවශ්‍ය භාණ්ඩ 15 ක මිල සාධාරණ අයුරින් පවත්වා ගෙන යාම අපගේ අරමුණයි. එමෙන්ම එම භාණ්ඩ රට පුරා බෙදා හැරීම සඳහා අවශ්‍ය පියවර ද ගන්නවා. මෙම භාණ්ඩවල මිල වෙනත් රටක වැඩි වුවහොත් ඒ සඳහා රජය මැදිහත් වී මෙරට දී එම භාණ්ඩ සාධාරණ මිලකට ලබාදීම සඳහා අවශ්‍ය සහනාධාර ලබා දෙනවා.

එමෙන්ම අත්‍යවශ්‍ය භාණ්ඩ ගණනාවක මිල නියම කිරීමට ද රජය කටයුතු කර තිබෙනවා. එලෙස නියම කළ මිලට වැඩියෙන් විකුණනවා නම් ඒ සඳහා පියවර ගන්නා ලෙස කර්මාන්ත හා වාණිජ කටයුතු අමාත්‍යාංශයටත්, පාරිභෝගික අධිකාරියටත් දන්වා තිබෙනවා.

වැට් බද්ද අය නොකරන භාණ්ඩ සිය ගණනක් තිබෙනවා. ජනතාවට අවශ්‍ය ආහාර ද්‍රව්‍ය සඳහා අප වැට් බදු අය කරන්නේ නැහැ. නමුත් සමහර වෙළෙඳසැල්වල වැට් බදු අය නොකරන භාණ්ඩවලත් මිල වැඩි කර තිබෙනවා. ඊට විකල්පයක් වශයෙන් සතොස වෙළෙඳසැල්වලට අමතරව වැට් බදු නැති අත්‍යවශ්‍ය භාණ්ඩ විකුණන කඩ සාප්පු මෙන්ම සමාගම්වල ශාඛා රට පුරා ඇති කිරීමට අප පියවර ගෙන තිබෙනවා.

මේ පිළිබඳව දැන්වීම් පළ කර එහි සාමාජිකත්වය ලබා ගන්නැයි අප සමාගම්වලින් ඉල්ලා තිබෙනවා. අපගේ ක්‍රමයට එකතු වන්නැයි අප ව්‍යාපාරිකයන්ගෙන් ඉල්ලා සිටිනවා. ඔබට ආණ්ඩුවෙන් උපකාර ලැබේවි. අත්‍යවශ්‍ය භාණ්ඩ විකුණන සැපයුම්හල් රට පුරා ඇති කොට ජනතා සහන ලබාදීමේ වැඩපිළිවෙළ යථාර්ථයක් බවට පත් කිරීම අපගේ අරමුණයි. එවැනි සුපිරි වෙළඳසැල්, කඩ සාප්පු 500 – 1000 ක් පමණ රට පුරා ඇති කිරීමට හැකි වේවි. ඒ අනුව සෑම කඩ මණ්ඩියකම අත්‍යවශ්‍ය භාණ්ඩ සැපයුම් ශාලා පිහිටුවීමට හැකියාව ලැබේවි. අප මෙම පියවර අනුගමනය කරන්නේ ජනතාවට ජීවත් වීමට අවශ්‍ය මූලික භාණ්ඩ සාධාරණ මිලකට මේ වසරේ සහ ලබන වසරේ ලබාදීමයි.

යහපාලන රජය විසින් භාර ගත්තේ සම්පූර්ණයෙන්ම කඩා වැටුණු ආර්ථිකයක්... සම්පූර්ණයෙන්ම සුන්නද්දූලි වී ගිය ආර්ථිකයක්. අපට ණයට ගෙවන්න තිබෙනවා. රාජපක්‍ෂ රජය අපට පරම්පරා පහ හයකට තරම් ණය බරක් උරුම කර දී තිබෙනවා. අප ඒ ණය බර අඩු කරන්නේ කෙසේද? මෙරට සංවර්ධනයක් ඇති කරන අතරතුර එම කාලසීමාව ඇතුළත දී ජනතාවට සහනයක් ලබාදීමට අවශ්‍යයි. එම නිසා අප ඊළඟට ක්‍රියාත්මක කරන්නේ සාධාරණ මිලකට අත්‍යවශ්‍ය භාණ්ඩ සියල්ලම ලබා දෙන වැඩසටහක් බව මෙහිදී මා අවධාරණය කරනවා.

ජනතාවගේ ජීවිතය ගොඩනැගීමට නම් සාධාරණ මිලකට භාණ්ඩ ලබාදෙන අතරම නිවාස ප්‍රශ්නය විසදිය යුතු වනවා. හොඳ අධ්‍යාපනයක් ලබාදිය යුතු වනවා. වර්තමානයේ දී සෑම දරුවෙකුට වසර 13 ක අධ්‍යාපනයක් ලැබෙන්නේ නැහැ. බොහෝ අය වසර කිහිපයකින් පාසලෙන් ඉවත් වී යනවා. ඇතැමුන් අපොස සාමාන්‍ය පෙළ විභාගයෙන් පසු පාසලෙන් ඉවත් වෙනවා. සාමාන්‍ය පෙළ විභාගයෙන් පසුවත් සෑම ශිෂ්‍යයෙකුම පාසලේ තබා ගෙන වැඩිදුර අධ්‍යාපනයක් ලබාදීම එක්සත් ජාතික පෙරමුණු ජාතික රජයේ අරමුණයි.

පළමු වසරේ සිට 10 වන වසර දක්වා කාලයේ දී පාසල හැර යන සිසුන්ගේ ප්‍රශ්න කෙරෙහි අවධානය යොමු කොට ඒ අය පාසලේ රඳවා ගැනීමට ද අප වැඩපිළිවෙළක් සකසනවා. සියලූ දෙනාටම වසර 13 ක අනිවාර්ය අධ්‍යාපනයක් ලැබෙන ක්‍රමයක් ක්‍රියාත්මක කිරීම ජාතික රජයේ අරමුණයි. නිදහස් අධ්‍යාපනය අර්ථවත් කිරීම සඳහා ජේ.ආර්. ජයවර්ධන ජනාධිපතිතුමා නොමිලයේ පෙළ පොත් ලබා දුන්නා. දැන් අපේ අරමුණ වන්නේ සියලූම ලාංකීය සිසු සිසුවියන් උදෙසා අධ්‍යාපනයක් ලබාදීමයි.

එවැනි වැඩ කටයුතු රාශියක් ඇරැඹිමට ජාතික රජය කටයුතු කරනවා. ඒ සියලූ දේ කරන්නේ ජනතාව ජීවත් කරවීමටයි. ඒ සඳහා රජයට මුදල් අවශ්‍යයි. එම නිසා අත්‍යවශ්‍ය නොවන භාණ්ඩ සඳහා වැට් බද්ද 11% සිට 15% දක්වා වැඩි කිරීමට අපට සිදු වුණා. ශ්‍රේෂ්ඨාධිකරණ නියෝගය අනුව එය තාවකාලිකව අතිහිටුවා තිබෙනවා. නමුත් නීතිය සම්මත වීමෙන් පසුව ඒ කටයුතු ඉදිරියට ගෙන යාමට සිදු වෙනවා. රටේ ජනතාවට අනාගතයක් ලබාදීම සඳහා අපට අධ්‍යාපනය වෙනුවෙන් මුදල් වියදම් කළ යුතුව තිබෙනවා.

රාජපක්‍ෂ රෙජීමය යටතේ අධ්‍යාපනය සඳහා වියදම් කළේ දළ දේශීය නිෂ්පාදිතයෙන් 1.9% ක ප්‍රතිශතයක් පමණයි. එම නිසා නිදහස් අධ්‍යාපන අයිතීන් කප්පාදු වුණා. ජාත්‍යන්තර පාසල් ඇති වුණා. යහපාලන රජය අධ්‍යාපනය වෙනුවෙන් වැය කරන මුදල 2.9% දක්වා මේ වන විටත් වැඩි කර තිබෙනවා. එමෙන්ම සෞඛ්‍ය සඳහා වියදම් කරන මුදල් ප්‍රමාණය ද වැඩි කර තිබෙනවා. මේ සියලූ පියවර ගන්නේ ජනතාව වෙනුවෙන්... අධ්‍යාපනය දියුණු කිරීමේ වාසිය සියලූ දෙනාටම ලැබෙනවා.

අප ඉදිරියට යන්නේ අතීතයේ දී සිදු වූ අඩුපාඩුකම් හදා ගෙනයි. රජයේ ආදායම වැඩි කළ යුත්තේ ඒ අඩුපාඩුකම් හදා ගැනීම සඳහායි. නමුත් අප රජයේ ආදායම් වැඩි කළ යුතු වන්නේ ජනතාවට බරක් නොවන අයුරිනුයි. අත්‍යවශ්‍ය භාණ්ඩ 15 ක් සාධාරණ මිලකට ජනතාවට ලබාදීමට කටයුතු කළේ ඒ නිසයි.

අපට මෙතැනින් නවතින්නට හැකියාවක් නැහැ. ඔබේ දරුවන්ට හොඳ අධ්‍යාපනයක් ලබාදිය යුතුයි. හොඳ ආදායම් මාර්ග සලසා ගත යුතුයි. තරුණ තරුණියන් සඳහා රැකියා නිර්මාණය කළ යුතුයි. මෙතෙක් කල් තරුණ තරුණියන්ට රැකියා ලැබුණේ නැහැ. රටේ සංවර්ධනයක් ඇති වුණේ නැහැ. කර්මාන්ත ශාලා දියුණු වුණේ නැහැ. නමුත් අප රජය යටතේ රට පුරා සංවර්ධන කලාප රාශියක් ඇති කරනවා. මහනුවරින් පටන් ගෙන වැල්ලවාය දක්වා අති විශාල සංවර්ධන සංග්‍රාමයක් සිදු කරනවා. කර්මාන්ත ශාලා, සංචාරක ව්‍යාපාරය දියුණු කරන ආකාරය ගැන තව මසකින් පමණ ඔබ සියලූ දෙනා දැනුවත් කිරීමට අප සූදානම්... අප එතැන් සිට ඉදිරියට යා යුතුයි.

ශ්‍රී ලංකාවේ ශක්තිමත් මධ්‍යම පන්තියක් ඇති කිරීම අපේ අරමුණයි. ශක්තිමත් ගොවි ජනතාවක් ඇති කළ යුතුයි. එසේ කරන්න නම් රටේ සංවර්ධනයක් තිබිය යුතුයි. ජනතාව අත මුදල් ගැවසිය යුතුයි. සියලූ දෙනාටම මුදල් ඉපැයීම සඳහා මාර්ග නිර්මාණය විය යුතුයි. රට දියුණු කළ හැකි වන්නේ එවිටයි. අප එම කාර්යයත් මේ වන විට ආරම්භ කර තිබෙනවා. එක් පැත්තකින් ජනතාව ජීවත් කරවන අතරතුර අනෙක් පැත්තෙන් දියුණුව ඉදිරියට ගෙන යන යුගය අප ආරම්භ කර තිබෙනවා. ජනාධිපති මෛත්‍රීපාල සිරිසේන මහතාගේ මූලිකත්වයෙන් මෙම කටයුතු අප විසින් ආරම්භ කර තිබෙනවා.

අපට මෙම සියලූම සංවර්ධන සංග්‍රාම ඇරැඹිමට හැකි වූයේ ඉදිරියට යාමට ජනතාව සිටින එක්සත් ජාතික පක්‍ෂය නිසයි. එක්සත් ජාතික පක්‍ෂය නොමැති නම් මෙම ණය කන්දරාව ගෙවා දැමීමේ ශක්තිය අපට ලැබෙන්නේ නැහැ. අද අප ජනතාවට බර පටවන්නේ නැතිව ණය ගෙවමින් සිටිනවා. එමෙන්ම අනාගතයේ දී විදේශ ආධාර ලබා ගෙන ජනතා බර අවම කරමින් රට දියුණුව කරා ගෙන යනවා. අපට අවශ්‍ය වන්නේ රටේ ජනතාවට ජීවිතය ගෙන යාම සඳහා සාධාරණ මිලට භාණ්ඩ ලබා දී අධ්‍යාපනය දියුණු කොට ඉදිරියට යාම සඳහා රැකියා සහ ස්වයං රැකියා බිහිකොට ශක්තිමත් මධ්‍යම පන්තියක්, ශක්තිමත් ගොවීන්, ධීවරයින් සිටින රටක් බිහි කිරීමයි.

උතුරු කොළඹරැස්වීම සංවිධානය කළ රවී කරුණානායක මහතා ඇතුලූ සියලූ දෙනාටම මා මෙහිදී ස්තඣතිය පළ කරනවා. මුදල් අමාත්‍යවරයා ලෙස ජනතා සහන ලබාදීම සඳහා විශාල සේවයක් කර තිබෙනවා. අපේ ලොකුම සටන ආර්ථික සටනයි. අප ඒ සටන ජයගත යුතුයි. ඒ සටන ජය ගෙන ජනතාව ජයග්‍රහණය කළ යුතුයි. දූෂණය නැති කොට හොඳ සමාජයක් ඇති කළ යුතුයි.

අප ගෙන යන ව්‍යාපාරයට සහාය දැක්වීම සඳහා සියලූ දෙනාම එක්සත් ජාතික පක්‍ෂය සමග එක්වන්නැයි ඉල්ලා සිටිනවා.


 
ෆීල්ඩ් මාර්ෂල් සරත් ෆොන්සේකා මහතා ප්‍රාදේශීය සංවර්ධන අමාත්‍යාංශයට ප්‍රවිශ්ඨ වීම PDF Print E-mail
අද (14) දින ෆීල්ඩ් මාර්ෂල් සරත් ෆොන්සේකා මහතා ප්‍රාදේශීය සංවර්ධන අමාත්‍යාංශයට ප්‍රවිශ්ඨ වීම නිමිත්තෙන් පැවති උත්සවය සදහා සහභාගි වූ අග්‍රාමාත්‍ය රනිල් වික්‍රමසිංහ මහතා.
 
නව තෙල් නල එළීමේ ව්යාමපෘතියෙන් පීඩාවට පත් වන ජනතාවගේ ගැටලුව විසඳීමට මුදල් අමාත්ය3 රවී කරුණානායක මැතිතුමා මැදිහත් වෙයි... PDF Print E-mail

කොළඹ වරායේ සිට ඔරුගොඩවත්ත තෙල් ගබඩා සංකීර්ණය දක්වා නව නල පද්ධතිය එළීමේ ව්‍යපෘතිය සඳහා ප්‍රදේශයේ ජනතාව ඉවත් කළ යුත්තේ ඔවුන්ට ස්ථිර නිවාස ඉදිකර දීමෙන් පසුව බව මුදල් අමාත්‍ය රවී කරුණානායක මැතිතුමා අවධාරණය කරයි. අමාත්‍යවරයා පෙන්වා දෙන්නේ ස්ථිර නිවාස ඉදිකර දීමෙන් තොරව ජනතාව එම ප්‍රදේශවලින් ඉවත් කිරීමට උත්සහ කිරීම ගැටලු සහගත බවයි. අමාත්‍ය රවී කරුණානායක මැතිතුමා මේ බව කියා සිටියේ තෙල් නල මාර්ගය අවට වෙසෙන ජනතාවගේ ගැටලුව පිළිබඳ සාකච්ඡා කිරීම සඳහා වගකිය යුතු ආයතනවල නියෝජිතයන් සමග අද (13) මුදල් අමාත්‍යාංශයේ පැවැති සාකච්ඡාවකට එක් වෙමිනි.

උතුරු කොළඹ ප්‍රදේශයේ ජනතා නියෝජිතයකු ලෙස මුදල් අමාත්‍ය රවී කරුණානායක මැතිතුමා කැඳවා තිබූ මෙම සාකච්ඡාව සඳහා ශ්‍රී ලංකා දුම්රිය දෙපාර්තමේන්තුව, සිලෝන් පෙට්‍රෝලියම් ස්ටෝරේ ටර්මිනල්ස් ආයතනය සහ නාගරික සංවර්ධන අධිකාරියේ නියෝජිතයෝ එක්ව සිටියහ.

නව නල එළීම හේතුවෙන් පවුල් 130ක් පමණ පිරිසක් පීඩාවට පත් වන බවත් ඔවුන් දැනට පදිංචිව සිටින නිවාස 44ක් මේ හේතුවෙන් සම්පූර්ණ හානියට පත් වන බවත් මෙහි දී අනාවරණ විය. මුදල් අමාත්‍ය රවී කරුණානායක මැතිතුමා කියා සිටියේ ඔවුන්ට ස්ථිර නිවාස ලබා දී එම ප්‍රදේශයෙන් ඉවත් කිරීමෙන් පසු මෙම ව්‍යාපෘතිය ආරම්භ කළ යුතු බවයි.

දුම්රිය සාමාන්‍යාධිකාරී බී.ඒ.පී ආරියරත්න, සිලෝන් පෙට්‍රෝලියම් ස්ටෝරේ ටර්මිනල්ස් ආයතනයේ කළමනාකාර අධ්‍යක්ෂ ෂෙහාන් සෙනෙවිරත්න සහ නාගරික සංවර්ධන අධිකාරියේ බස්නාහිර පළාත් අධ්‍යක්ෂ එස්.එන්. නිශ්ශංක යන මහත්වරු ඇතුළු පිරිසක් මෙම අවස්ථාවට එක් වූහ.
Last Updated on Thursday, 14 July 2016 11:05
 
<< Start < Prev 1 2 3 4 5 6 7 8 9 10 Next > End >>

Page 7 of 148
Copyright © 1946 - 2016. United National Party. Designed by Acelabs.org